<p style="text-align: justify;"><strong>जकार्ता :</strong> भारताचा जिन्सन जॉन्सन हा पुरुषांच्या 1500 मीटर शर्यतीत एशियाड सुवर्णपदकाचा मानकरी ठरला आहे. इंडोनेशियातील एशियाडमध्ये त्याचं हे दुसरं पदक ठरलं. 1800 मीटर शर्यतीत जॉन्सन हा रौप्यपदकाचा, तर मनजीतसिंग सुवर्णपदकाचा मानकरी ठरला होता.</p> <p style="text-align: justify;">मनजीतसिंगला 1500 मीटर्स शर्यतीत चौथ्या क्रमांकावर समाधान मानावं लागलं. या शर्यतीत जिन्सन जॉन्सननं तीन मिनिटं आणि 44.72 सेकंदांची सर्वोत्तम वेळ दिली. इराणच्या अमिर मोरादीला रौप्य, तर बहारिनच्या मोहम्मद तिवलीला कांस्यपदकावर समाधान मानावं लागलं.</p> <p style="text-align: justify;"><strong>भारताच्या खात्यात आज पाच पदकं</strong> एशियाडच्या बाराव्या दिवशी भारताच्या खजिन्यात दोन सुवर्ण, एक रौप्य आणि दोन कांस्य अशी पाच पदकांची भर पडली. पुरुषांच्या 400 मीटर रिलेत भारतीय धावपटूंना रौप्यपदकावर समाधान मानावं लागलं. रौप्यविजेत्या भारतीय संघानं या रिलेत तीन मिनिटं आणि 1.85 सेकंद वेळेची नोंद केली.</p> <p style="text-align: justify;">आशियाई विजेत्या पी. यू. चित्रानं एशियाडमध्ये भारताला 1500 मीटर्स शर्यतीचं कांस्यपदक पटकावून दिलं. भारताच्या गतविजेत्या सीमा पुनियाला महिलांच्या थाळीफेकीत कांस्यपदकावर समाधान मानावं लागलं.</p> <p style="text-align: justify;">गतविजेत्या भारताला एशियाडमधील पुरुषांच्या हॉकीत उपांत्य फेरीतच हार स्वीकारण्याची वेळ आली. मलेशियानं या सामन्यात भारताचा सडन डेथमध्ये 7-6 असा पराभव केला. या पराभवामुळं 2020सालच्या टोकियो ऑलिम्पिकसाठी थेट पात्र ठरण्याची भारताची संधी हुकली.</p> <p style="text-align: justify;"><strong>भारत आठव्या स्थानावर</strong> एशियाडच्या पदक तालिकेत भारत आठव्या स्थानावर आहे. भारताच्या खात्यात आतापर्यंत 13 सुवर्ण पदक, 20 रौप्य पदक, 25 कांस्य पदक आहेत. तर 111 सुवर्ण पदकांसह 239 पदकांची कमाई करणारा चीन या यादीत अव्वल स्थानी आहे.</p>
from home https://ift.tt/2wxI6uJ
No comments:
Post a Comment